今日係追月,一大清早,媽咪話返去探下婆婆,所以我為有陪佢返去啦,佢一個返我真係有D擔心。

 

雖然話婆婆家離香港唔係好遠,都要三個鐘車程。世事有時真係好奇,如果平時少搭的士的話,成年都唔會搭,一搭的話果排就會不斷搭架啦,就好似我呢個星期咁,星期一、二、三、四每日都不得不搭一次的士,心痛死我啦!就好似今日咁,朝早同媽咪落樓下等小巴去旺角,等左三四架車都上唔到(滿座),咁媽咪就話買個包俾我依下肚先,我阻都阻唔住,媽咪行開左只係一陣(大約十分鐘左右),走左四架車,其中兩架仲係空車tim...到媽咪買完返來時,我地又等左兩架車都上唔到,我開始有小小不耐煩了,於事媽咪就話搭的士,咁好啦,上左的士,就見到一架得兩三個人的小巴駛過。嘩!!!!!咁係未叫玩我啦!要佢時佢就唔俾我,唔要佢時佢就鬼咁多架係我眼前駛過!


今日見到婆婆精神唔錯呀!還記得上個月佢有病入院,我同媽咪爹地急急腳咁趕返去探佢,見到病床上頭髮少許零亂給病魔折磨得骨瘦如柴的外婆,心痛如麻,當婆婆用佢無用的右手抓住我話無事時,我眼睛一酸,眼淚在眼眶中動盪着,婆婆反安慰我說無事;事隔一個月,今天的外婆精神奕奕,還會說笑呢!今日雖是不斷地落着綿綿細兩無間斷,到了夜晚,月亮姐姐也不時地露下面兒,好快地又怕羞地藏匿在雲層裡面了。

 

探完外公外婆,大約八點鐘就搭車回家了,到左屋企都已經11點幾到。

 

呢張係喺外婆家門口影架,因為相機問題,但都唔錯架啦!


 

 

 呢張會光D,但都有少少手震。

 

  

希望大家都過一個開心快樂的中秋啦!人地話十五月亮十六圓!祝天下正在拍拖的人:有情人終成眷屬!未拍拖的人:好快可以搵到個能和自己共過佳節,團團圓圓啦!(我都希望可以,哈哈!)

創作者介紹
創作者 喜愛薰衣草的女孩 的頭像
喜愛薰衣草的女孩

喜愛薰衣草的女孩的部落格

喜愛薰衣草的女孩 發表在 痞客邦 留言(0) 人氣()